Разговорите помеѓу Владимир Путин и претставниците на американскиот претседател Доналд Трамп, Стив Виткоф и Џарад Кушнер, траеја повеќе од три часа и беа „суштински, конструктивни и исклучително искрени“, објави рускиот претседателски советник, Јуриј Ушаков.
Ушаков рече дека Русија ја објаснила својата проценка за воената операција во Украина и го нотирала, како што рече, значајниот напредок на руската армија во борбената зона. Разговорите опфатиле и економска соработка и „потенцијални големи, меѓусебно корисни руско-американски проекти“.
Двајцата американски претставници, денеска се во главниот град на Украина, Киев.
Разговорите доаѓаат во време кога двете страни продолжуваат да ги ескалираат воздушните напади. Путин и украинскиот претседател Зеленски се согласија да ги прекинат нападите врз главните градови еден на друг додека траат разговорите.
Напорите на Вашингтон за прекин на борбите изгубија интензитет, откако вниманието на САД во последните шест месеци беше насочено кон војната со Иран.
Последната позната посета на Москва од страна на Виткоф и Кушнер, беше организирана во јануари.
