Преговарачите на САД, Украина и Европа разговарале шест часа на првиот од двата дена средби, за безбедносните гаранции, енергетската отпорност и извозот на жито, во момент кога Кремљ тврди дека Украина ја пропуштила можноста за обновување на трилатералните преговори.
Според американскиот преговарач Стив Виткоф, разговорите биле насочени кон краткорочни мерки поврзани со подготовките за зимата, вклучително и зајакнувањето на енергетската отпорност и извозот на жито, како и кон безбедносните гаранции. На дневен ред биле и долгорочни договори за безбедноста на Украина и Европа.
На разговорите во Мајами присуствувал и Џаред Кушнер, зетот на Трамп, како и американски претставници од Советот за национална безбедност и Министерството за финансии.
Од европска страна, Вашингтон ги
поканил советниците за национална безбедност на Франција, Германија и Велика Британија. Европската Унија ја претставувал шефот на кабинетот на претседателката на Европската комисија, Урсула фон дер Лајен, додека генералниот секретар на НАТО, Марк Руте, го испратил својот шеф на кабинетот.
Средбата, сепак, делумно беше засенета од најавата на Трамп за договор за испорака на руски дизел на американскиот и на светскиот пазар.
