Според прелиминарните официјални резултати објавени по полноќ, Христијанско-демократската унија (ЦДУ) за првпат во историјата остана без места во парламентот на покраината Мекленбург-Западна Померанија, бидејќи на изборите освои 4,9 отсто од гласовите и остана под изборниот праг од пет отсто. Во меѓувреме, АфД стана најсилната партија во покраината, пренесува „Билд“.
Мерц го нарече изборниот резултат во Мекленбург-Западна Померанија „катастрофа“, оценувајќи ги резултатите како „тешки“, со порака дека се неопходни реформи.
Тој исто така презеде одговорност и порача дека има намера да продолжи да ги извршува функциите канцелар и претседател на ЦДУ.
Социјалдемократската партија (СПД) во Мекленбург-Западна Померанија освои 35,5 отсто од гласовите, Левицата 6,5, а Зелените 5,7 отсто, додека БСВ со 4,8 и Слободните демократи (ФДП) со еден отсто од гласовите останаа без места во покраинскиот парламент.
СПД, предводена од покраинската премиерка Мануела Швезиг, според резултатите, таму може да формира влада со Левицата и Зелените.
На изборите во Берлин, кои исто така се одржаа вчера, победи Левицата со 25,7 отсто од гласовите, што е повеќе од двојно подобар резултат за оваа партија во споредба со претходните избори.
ЦДУ во таа покраина освои 18,8 отсто од гласовите и го зазеде второто место, додека АфД со 16,3 отсто, Зелените со 14,3 и СПД со 12,1 отсто исто така освоија места во парламентот.
БСВ остана под изборниот праг со 4,7 отсто, додека ФДП оствари уште послаб резултат.
Во Мекленбург-Западна Померанија, АфД ја предводеше Лајф-Ерик Холм, додека СПД ја предводеше Швезиг.
