Родителите на загинатите во кочанската дискотека, на денешното рочиште реагираа на изјавата на вештакот на одбраната, кој на денешното судење кажа дека „Пулс“ имал три излези и три влеза.
,,Од тоа што го слушаме од вештакот на одбраната, човек навистина може да се запраша што точно треба да покаже едно вештачење – стручност или начин како да се оправда неодбранливото?
Слушаме споредби, различни толкувања и аргументи кои повеќе создаваат дилеми отколку што даваат јасни одговори. А за нас, родителите, тоа е неприфатливо.
Кога се зборува за трагедија во која изгубивме 63 млади животи, очекуваме конкретни и јасни одговори, а не конструкции и дополнителни толкувања со кои се замаглува суштината.
Кое прашање е поставено, кој факт се разјаснува и каде е доказот што го потврдува кажаното? Токму тоа сакаме да го слушнеме.
Одбраната има право да ја гради својата теза, но не може со споредби и небулозни аргументи да ја промени вистината што треба да произлезе од доказите.”
Судењето продолжува.
Во трагедијата во кочанската дискотеката „Пулс“, животот го загубија 63 лица, а над 200 беа повредени.
