Русија ја обвини Украина за напад врз рафинерија за нафта, откако Володимир Зеленски изјави дека ваквите напади, кои беа запрени на барање на САД, повторно ќе продолжат.
Украинскиот претседател изјави дека ги ограничил нападите во период од три дена, додека Русија продолжила да ја напаѓа украинската енергетска инфраструктура. „Со тоа завршивме“, изјави тој за „Фајненшл тајмс“.
Зеленски, исто така, ги обвини САД дека го прекинале споделувањето разузнавачки информации за руските напади, со цел да извршат притисок врз Киев целосно да ги запре нападите, откако Вашингтон постигнал договор за увоз на руски дизел.
Тој посочи и дека ограничувањата на сателитските услуги на „Старлинк“, кои ги користи украинската војска, биле намерно воведени.
Извори од украинската одбрана за Би-би-си изјавиле дека дел од функционалностите на „Старлинк“ биле повторно воспоставени до четврток наутро.
Според нив, повторно била овозможена функцијата „работа во движење“ на воената услуга „Старшилд“ (Starshield), иако сè уште не е јасно дали целосно се укинати ограничувањата на брзината со која беспилотните летала можат да се движат, а притоа да ја одржуваат интернет-врската преку „Старлинк“.
Изворите додале дека надлежните сè уште работат на утврдување на „причините и околностите“ за ваквата одлука.
Во меѓувреме, во одделен инцидент, седум лица се водат како исчезнати откако во напад со дрон избувнал пожар на танкер за превоз на хемикалии во близина на романскиот брег, соопштиле поморските власти.
Москва соопшти дека погодила два товарни брода што превезувале воен товар кон украинското пристаниште Одеса, без да ги наведе нивните имиња.
Кремљ соопшти дека Киев „се обидел да изврши напад од големи размери“ врз рафинерија за нафта јужно од Москва, во раните утрински часови во четвртокот.
Според руското Министерство за одбрана, биле пресретнати четири ракети и десетици беспилотни летала, а остатоците што паднале предизвикале пожар во рафинеријата во Рјазан.
Претседателот Владимир Путин изјави дека Киев и во средата се обидел да нападне рафинерии, што Украина го негираше, додавајќи дека досега не била предизвикана „значителна штета“.
Зеленски изјави дека десетици украински градови биле цел на руски напади во изминатото деноноќие.
Тој претходно изјави дека ќе се согласи на „енергетското примирје“, кое американскиот претседател Доналд Трамп го најави во неделата, доколку и Москва го почитува.
Сепак, Зеленски ја обвини Русија дека го игнорирала предложениот договор само неколку часа по неговото објавување, при што во нападите стотици илјади Украинци останале без електрична енергија. Кремљ никогаш не соопшти дека се согласил со договорот.
Запрашан од Пирс Морган во средата вечерта дали се чувствува предаден од САД, Зеленски одговори потврдно, откако Вашингтон, според извештаите, се повлекол од клучни елементи на својата поддршка за Украина.
Европските лидери застанаа во поддршка на украинскиот претседател. Италијанскиот министер за одбрана, Гвидо Крозето, за Би-би-си изјави дека ограничувањето на размената на разузнавачки информации од страна на САД со Киев би било „целосна грешка“.
