Советот на ЕУ усвои мерка за помош
во рамки на Европскиот мировен фонд во вредност од 10 милиони евра. Парите се наменети за зајакнување на оперативните капацитети и подготвеноста на Балканските медицински наменски сили.
Делегацијата на ЕУ ја нагласува континуираната ангажираност на блокот и на земјите-членки со партнерите од Западен Балкан во областа на безбедноста и одбраната.
Европскиот мировен фонд беше воспоставен во март 2021 година за финансирање активности во рамките на заедничката надворешна и безбедносна политика, со цел спречување конфликти, зачувување на мирот и зајакнување на меѓународната безбедност и стабилност.
Фондот и овозможува на ЕУ да финансира активности наменети за зајакнување на капацитетите на трети земји, како и на регионални и меѓународни организации во областа на воените и одбранбените прашања.
Балканските медицински наменски сили и вооружените сили на партнерите што даваат придонес ќе добијат опрема за теренски болници, воено-медицински возила и системи за комуникација и информации, како и соодветни материјали и услуги, вклучително и техничка обука онаму каде што е потребно.
