Децата кои на 12-годишна возраст имаат сопствен паметен телефон имаат поголема веројатност да развијат симптоми на нарушувања во исхраната во споредба со нивните врсници кои немаат такви уреди, покажува ново истражување.
Истражувањето, објавено во петокот во медицинското списание „JAMA Network Open“, се темели на опсежна анкета спроведена меѓу речиси 9.000 адолесценти ширум САД.
„Паметниот телефон може да стави цел свет со содржини фокусирани на изгледот во џебот на млад човек“, изложувајќи го на фотографии и пораки кои можат да поттикнат нездрави навики во исхраната, изјави д-р Џејсон Нагата, главниот автор на студијата.
„Важно е родителите да бидат свесни дека добивањето паметен телефон не се однесува само на самиот уред. Тоа може да го промени пристапот на детето до различни содржини и влијанија во дигиталниот свет“, додаде тој.
Можеби не е важно само дали на детето ќе му купите телефон, туку и кога ќе му го купите, вели тој.
Помладите деца кои имаат телефон може да имаат проблеми
Поминувaњето време пред екран и на социјалните мрежи е поврзано со низа негативни последици кај децата, вклучително и депресија, пониско чувство на самодоверба и експериментирање со дрога и алкохол. Претходните истражувања на тимот на Нагата покажале и поврзаност меѓу времето поминато пред екран и епизодите на прејадување.
Повеќето досегашни истражувања се фокусирале на тоа колку време младите поминуваат на своите уреди, вели Нагата, вонреден професор по педијатрија на Универзитетот на Калифорнија во Сан Франциско.
За новото истражување, тој сакал да се фокусира на возраста на која децата почнуваат да користат паметни телефони и на тоа како нивното користење може да влијае врз развојот на нарушувања во исхраната подоцна во животот.
Според проценките од истражувањата, околу 22 отсто од децата и адолесцентите ширум светот покажуваат знаци на нарушено однесување во исхраната.
Разликата меѓу нарушеното однесување во исхраната и дијагностицираното нарушување во исхраната главно се однесува на степенот на сериозност и на тоа дали лицето ги исполнува критериумите за медицинска дијагноза.
И двете состојби може да вклучуваат опседнатост со храната и телесната тежина, искривена перцепција на обликот и големината на телото, ограничување на внесот на храна, како и компензирање на внесените калории преку предизвикување повраќање или прекумерно вежбање.
Користејќи ги податоците собрани од „Adolescent Brain Cognitive Development Study“, голема долгорочна студија за развојот на мозокот и здравјето кај американските деца, Нагата и неговиот тим откриле дека 70 отсто од 12-годишниците имале сопствен паметен телефон.
Од нив, 24 отсто пријавиле најмалку еден симптом на нарушено однесување во исхраната на 14-годишна возраст.
За споредба, помалку од 16 отсто од тинејџерите кои немале паметен телефон на 12 години пријавиле нарушено однесување во исхраната две години подоцна.
