Во своето обраќање во услови на војна пред 193-членото Генерално собрание на ОН, Пезешкијан рече дека заканите само ќе ја зацврстат решителноста на Иран, отфрлајќи го предупредувањето на Трамп дека може да го уништи Иран доколку не биде постигнат договор.
„Изјавите што вчера ги даде американскиот претседател, се знак на менталитет на насилник. Иранскиот народ нема да се потчини на притисокот. Оние кои се терористи и обучуваат терористи, нè нарекуваат нас терористи“, рече тој, осврнувајќи се на оценката на Трамп дека Иран е водечки државен спонзор на тероризмот во светот.
Пезешкијан во неколку наврати во својот говор истакна дека Иран е подготвен преку преговори да ги надмине тензиите со САД, но предупреди дека Техеран нема да прифати јазик на сила.
Американската делегација ја напушти салата на почетокот на говорот на Пезешкијан. Американската мисија при Обединетите нации веднаш не одговори на барањето за коментар.
Пезешкијан го започна своето обраќање обвинувајќи ги САД дека убивале цивили за време на војната, при што покажа фотографии, меѓу кои и фотографија од ученички во училница.
Според ирански официјални лица, во ракетен напад врз основно училиште во Минаб на 28 февруари – само неколку часа откако американските и израелските напади врз Иран го започнаа конфликтот – загинале повеќе од 175 деца и наставници.
Пентагон јавно не ги објавил резултатите од истрагата за нападот врз Минаб, најсмртоносниот инцидент со цивилни жртви во кој е вклучена американската војска во изминатите неколку децении. „Ројтерс“ на 5 март објави дека првичната интерна истрага на американската војска покажала дека американските сили најверојатно се одговорни за нападот.
Пезешкијан рече дека Иран нема намера да се обиде да произведе нуклеарно оружје, но дека нема да се откаже од своето право на мирољубива нуклеарна програма.
Ниту нуклеарно оружје, ниту откажување од нуклеарното знаење“, рече тој.
