СДСМ поднесе интерпелација за министерот за локална самоуправа Иван Стоилковиќ, барајќи да се утврди неговата политичка одговорност за, како што тврдат од партијата, постапувања спротивни на државните интереси и нарушување на угледот на Собранието.
Пратеникот на СДСМ, Митко Трајчулески, на прес-конференција ги образложи причините за иницијативата, посочувајќи ги јавните настапи и политичките активности на Стоилковиќ, неговите наводни врски со српски разузнавачки структури, како и поврзаноста со руските и кинеските политички агенди.
Трајчулески го спомена и патувањето на министерот во Кина, како и неговото појавување со делегација на Српската напредна партија и српскиот претседател Александар Вучиќ.
Од СДСМ реагираат и на содржини во кои, според нивните тврдења, се велича Ратко Младиќ, осуден за геноцид. Трајчулески посочи дека и ова прашање е опфатено со интерпелацијата, повикувајќи се на законските одредби што предвидуваат одговорност за одобрување или оправдување геноцид, злосторства против човечноста и воени злосторства.
Како дел од образложението, тој ги наведе и навредите, пцуењето и заканите упатени кон пратеници на СДСМ во Собранието, меѓу кои Фатмир Битиќи, Арбана Пашоли и самиот Трајчулески. Според него, Стоилковиќ досега не презел одговорност ниту се извинил за ваквото однесување.
Трајчулески оцени дека министер во држава членка на НАТО треба да ги почитува стратешките определби на земјата и надворешната политика усогласена со Европската Унија. Притоа, одговорност за случајот му припиша и на премиерот Христијан Мицкоски, за кого СДСМ тврди дека го именувал и политички го штити Стоилковиќ.
Од СДСМ велат дека со интерпелацијата очекуваат парламентарното мнозинство да се изјасни дали ќе застане во одбрана на достоинството на Собранието и државните интереси или ќе му даде поддршка на министерот.
