Во Скопје Сити Мол започнува тридневниот есенски базар „Обоена есен, рачно создадена“, кој ги обединува домашните креативци и ракотворци што создаваат уникатни производи со сопствен стил и автентичен дизајн.
Базарот е сместен на приземјето на трговскиот центар, а посетителите во текот на трите дена ќе имаат можност да ги разгледаат и купат производите на 26 современи ракотворци и домашни креативни брендови.
Понудата опфаќа разновидни рачно изработени предмети, меѓу кои накит, филигран, производи од епоксидна смола и полимерна глина, рачно украсена керамика, кожни и дрвени изработки, како и предмети направени од природни материјали.
Посетителите ќе можат да најдат и органска козметика, миризливи свеќи, декоративни производи за домот, декупаж, уметнички дела и рачно изработени предмети за деца. Станува збор за производи што ја истакнуваат креативноста на домашните автори и нудат поинаков избор од масовното производство.
Меѓу учесниците се GAIA, БУВ – раскажува приказна за дрвото, PURE BEAUTY by Emma, Forest Stories, SIRA Leather, Solar Creations, Zen.Zeal, Epoxy Handmade by Clay, Филигран од срма Софија, Crochet by Frosi, Игнеа козметика, Декупаж катче, Монкдолс, Јуник Корнер, Добро ми стои, Filigree LARGO, Еко восочни обвивки, Marcy_s_handmade, Шарено ќоше, Julie Decoupage, Ignis Creative, Витрум Студио, Custom Cakes by B, Јордан WoodWorkers, Тилиа органика и Фантаст уметничко студио.
Со оваа иницијатива, домашните креативци добиваат можност да ги претстават своите производи пред пошироката публика, а посетителите можат да откријат оригинални ракотворби и да ги поддржат локалните мали бизниси.
