Демонстрантите денеска ги преплавија улиците на Тирана, само неколку часа откако премиерот Еди Рама најави нови мерки за справување со бранот антивладини протести.
За време на дождливото попладне, демонстрантите се собраа пред Министерството за образование, по што се упатија кон кабинетот на Рама, каде што ги запалија столиците што премиерот ги поставил пред зградата како повик за дијалог со владата.
Протестите предводени од студентите, поттикнати од незадоволството поради наводната корупција во владата, недостигот на работни места и лошиот квалитет на образованието, овој месец го зафатија центарот на Тирана и се проширија и во други градови.
Демонстрантите, кои бараат оставка од Рама, запалија владини згради и банки, кршеа излози на продавници и откорнуваа коцки од тротоарите за да ги фрлаат кон полицијата.
Претходно денеска, Рама претстави нови мерки за спречување на насилството, вклучително и парични казни од 500.000 леки (околу 5.524 евра) за сите учесници на протестите што ќе прераснат во насилни, дури и ако самите не извршиле насилни дејства.
