ЕУ подготвува предлози со кои четири земји што се најблиску до членство во Унијата би добиле јасен, чекор по чекор пат кон членството – додека останатите и понатаму би заостанувале, пишува „Политико“.
За Црна Гора, Украина, Молдавија и Албанија се разгледуваат посебни патокази, изјавија за „Политико“ двајца високи функционери на Европската комисија кои работат на нацрт-предлозите, во рамките на напорите за забрзување на процесот кој трае веќе со децении. Тие зборувале под услов на анонимност поради чувствителноста на плановите.
Овие четири земји се сметаат за предводници во процесот на пристапување кон ЕУ, но и натаму напредуваат бавно и немаат јасна временска рамка за формален прием во членство. Иако Брисел долго време ги поддржува нивните кандидатури, патоказите би претставувале првпат да добијат гаранции дека, доколку продолжат да ги спроведуваат клучните реформи, ќе бидат примени во ЕУ – како и рамковни рокови за завршување на преговорите.
Патоказите попрецизно ќе дефинираат што се очекува од секоја земја кандидат, изјави еден од функционерите, но истовремено ќе создадат и обврски за постојните членки на ЕУ, чија согласност е неопходна за процесот да може да продолжи.
Плановите исто така ќе ги утврдат рамковните датуми за завршување на групите реформи, познати како преговарачки „кластери“, кои претставуваат важни пресвртници на патот кон членството.
Претседателката на Европската комисија, Урсула фон дер Лајен, за време на говорот за состојбата на Унијата на почетокот на септември вети насочена поддршка за земјите кандидати „кои постигнале најголем напредок“.
Сепак, другите земји кандидати кои се во порана фаза од процесот, како Косово, Македонија и Босна и Херцеговина, во овој момент нема да добијат патокази, потврдија функционерите. Истото важи и за Грузија, Турција и Србија, чии кандидатури практично се во застој поради загриженоста во врска со назадувањето во областа на демократијата и правосудството.
Портпаролот на Комисијата потврди дека новите патокази „ќе обезбедат пат кон завршување на пристапните преговори. Тие ќе утврдат јасна листа на приоритети, рокови и конкретни обврски, со цел најнапредните земји кандидати да ги спроведат неопходните реформи“.
Фон дер Лајен оваа недела ќе патува на Западен Балкан, каде што ќе разговара со лидерите на Црна Гора, Албанија, Македонија и Косово. Сепак, таа нема да ги посети Босна и Херцеговина и Србија, бидејќи двете земји се наоѓаат во период на национални избори.
