Македонската илустраторка Евгенија Трајковска ќе ја претставува Македонија на регионалниот „Камп за општествено ангажиран стрип и илустрација”, кој се одржува во рамките на познатиот „Фестивал на помирувањето“ (Festival pomirenja) во Нови Сад, Србија.
Активна стрип дипломатија
Учеството на македонски претставник на овој реномиран настан е обезбедено по иницијатива на здружението „Стрипот може“ со седиште во Велес. Како што информира Томе Трајков, претседател на здружението, ова е првпат македонски уметник да биде вклучен во овој престижен регионален проект, што отвора нови можности за меѓународна афирмација на домашната стрип сцена.
„Преку воспоставената соработка со организаторите од асоцијацијата ,,Културанова”, успеавме да издејствуваме простор и за македонски уметник на овој камп. Евгенија Трајковска со својот автентичен визуелен јазик, кој често обработува теми за идентитетот, интроспекцијата и човечките емоции, е одличен избор за достоинствено претставување на нашата културна сцена“, изјави Трајков.
Интензивна програма и работа со врвни ментори
На четиридневниот „Камп за општествено ангажиран стрип и илустрација – Dare to Care“ учествуваат вкупно 12 млади уметници, илустратори и стрип автори на возраст од 18 до 35 години. Покрај македонската претставничка, на кампот учествуваат селектирани учесници и учеснички од Србија, Босна и Херцеговина, Хрватска и Црна Гора.
Во текот на кампот, учесниците ќе работат под менторство на докажани регионални уметници:
• Јана Адамовиќ – позната српска стрип авторка и илустраторка со меѓународна кариера.
• Милош Докановиќ – илустратор и визуелен уметник.
Тие ќе ги водат младите низ процесот на визуелно раскажување (storytelling) и развивање на приказни кои промовираат емпатија, соочување со минатото, изградба на мир и општествена одговорност.
Големо финале на трибината „Стриполитика“
Стрип таблите и илустрациите што ќе ги изработат Евгенија Трајковска и останатите учесници за време на кампот, ќе бидат јавно презентирани пред новосадската публика на специјалната фестивалска трибина „Стриполитика“, која ќе се одржи за време на викендот на 7 и 8 ноември.
„Фестивалот на помирувањето“ е организиран од страна на асоцијацијата „Културанова“ од Нови Сад, во соработка со партнерските организации Heartifact, ProPeace, Youth Care for Change и Reporting Diversity Network. Главната цел е преку уметност и отворен дијалог да им се овозможи на младите луѓе од поранешните југословенски простори да зборуваат за чувствителни теми и да градат мостови на соработка.
