Во сабота, 10 октомври, со почеток во 19 часот, во НУЦК „Антон Панов” во Струмица ќе се одржи концертот „Трансформации”, музичко-истражувачки проект посветен на македонското музичко наследство.
На концертот ќе настапи гудачкиот квартет „Пламенка Трајковска”, во состав Пламенка Трајковска и Милена Гиевска-Андоновска на виолина, Љубица Бошкоска на виола и Александра Јаневска на виолончело.
Проектот е посветен на одбележувањето на 120-годишнината од раѓањето на Живко Фирфов македонски етномузиколог, композитор, диригент и музички деец, кој оставил значаен придонес во собирањето, запишувањето и проучувањето на македонскиот музички фолклор.
Концертот „Трансформации” е замислен
како можност публиката преку гудачкиот
квартет повторно да ја открие македонската музичка ризница и преку
неа да ја почувствува историјата,
културата и народната музика.
Концертот се реализира со поддршка на Министерството за култура и туризам на Македонија и НУЦК „Антон Панов” Струмица.
