Папата Лав XIV бил подложен на операција во вторникот за отстранување на канцероген израсток на белите дробови, соопшти Ватикан.
Операцијата била извршена во болницата „Џемели“ во Рим, каде што лекарите го отстраниле долниот лобус на десното белодробно крило на папата.
Според соопштението објавено од црквата, анализата на белодробното ткиво по интервенцијата ја потврдила претходната дијагноза на белодробен аденокарцином.
Според американската фондација за рак на белите дробови, аденокарциномот е најчестата форма на рак на белите дробови во САД и сочинува околу 40 проценти од сите случаи на ова заболување.
Лекарите соопштиле дека операцијата поминала успешно и траела околу 90 минути. По интервенцијата, папата се разбудил нормално, а по краток период на набљудување бил вратен во својата соба на десеттиот кат од болницата.
На 71-годишна возраст, Лав XIV е релативно млад папа и останува физички активен. Тој редовно вежба, игра тенис со својот личен секретар и ужива во јавањето коњи во Кастел Гандолфо, папската резиденција за одмор.
Не е познато дека папата пуши, но во неговото семејство има историја на малигни заболувања.
Во вторникот, Ватикан соопшти дека неговиот постар брат Луис, кој живее во Флорида, моментално е хоспитализиран поради одредена форма на рак. Нивната мајка, Милдред, починала од рак во 1990 година, на 77-годишна возраст.
Во писмо испратено до неколку пријатели во 1984 година, додека живеел во Рим, идниот папа напишал дека неговата мајка продолжува со хемотерапијата. Тој ја опишал како силна жена која добро се справувала со лекувањето, што му го олеснувало фактот што бил далеку од неа, во Чикаго.
Поради здравствената состојба, Папата ги откажал речиси сите јавни обврски во наредните денови, најмалку до 20 октомври. Засега, Ватикан не соопштил дали ќе бидат потребни дополнителни терапии.
