Тетовскиот театар ќе биде дел од програмата на Фестивалот на комедијата во Сува Река, Косово. На 12 септември пред фестивалската публика ќе ја изведе претставата „Драма за смеење“, во режија на Сулејман Рушити.
Дејството се одвива во театар, каде што преку постмодерна адаптација треба да оживеат ликовите на Вилијам Шекспир. Но, сцената станува простор за низа комични и неочекувани ситуации преку кои претставата проговорува за односите меѓу актерите, театарските работници, публиката и власта.
„Драма за смеење“ преку хуморот се занимава и со предизвиците со кои се соочуваат уметниците, поврзувајќи го театарскиот свет со ситуации и односи препознатливи од секојдневниот живот. На тој начин, сцената станува место на кое зад комедијата се отвораат и прашања за пошироките човечки и општествени односи.
Во претставата настапуваат Арсим Калеци, Шеќерие Илази, Петрит Незири, Ермал Чанга, Арта Зејнели, Елмир Сејфулаи, Сами Мустафа, Абдула Османи, Беким Јахиу, Линда Шабани и Хасим Мемиши Сопи.
Гостувањето во Сува Река ќе биде можност Тетовскиот театар да ја претстави својата продукција пред косовската фестивалска публика и да биде дел од програмата посветена на комедијата и современиот театарски израз.
