Во Кочани денеска, 14 ноември 2026 година, се одржа 51. издание на „Маршот за ангелите“, организиран од семејствата на загинатите во пожарот во дискотеката „Пулс“ и Здружението на граѓани „16 март 2025“.
Родителите на загинатите порачаа дека по 51. пат маршираат со истата болка и празнина, барајќи вистина, одговорност и правда. Тие истакнаа дека нивната борба не е само за 63-те млади животи изгубени во Кочани, туку и за сите невини жртви во трагедиите што ја потресоа Македонија.
Притоа ги посочија трагедиите во Ласкарци, каде загинаа 16 лица, пожарот во модуларната болница во Тетово со 14 жртви, несреќата на „Беса транс“ во која животот го загубија 45 лица, како и пожарот во „Пулс“ со 63 загинати.
Собирот започна во 16:05 часот во Паркот на Револуцијата, под мотото „Уште колку животи треба да згаснат за нешто да се преземе?“. Потоа учесниците продолжија кон Основниот суд во Кочани.
Оттаму, претставниците на семејствата, меѓу кои и Драги Стојанов, упатија апел до родителите и сограѓаните да им се приклучат и да покажат поголема солидарност и поддршка.
„Родители, каде сте да марширате со нас?“, прашаа тие, повикувајќи на поголема масовност во барањето за правда.