Терористичкиот напад врз припадник на Жандармеријата кој ја обезбедувал Амбасадата на Израел во Белград бил извршен 15 минути по полноќ, соопшти Министерството за внатрешни работи на Србија.
Малолетно лице е убиено, изјави за Радио-телевизија Србија министерот за внатрешни работи Ивица Дачиќ.
Според зборовите на Дачиќ, напаѓачот, извикувајќи „Алаху екбер“, се нафрлил врз жандармот со два ножа, по што припадникот на Жандармеријата употребил огнено оружје и го усмртил. Инцидентот се случил околу 15 минути по полноќ, во среда, на 28 октомври.
Дачиќ го окарактеризира настанот како терористички напад и наведе дека безбедносните служби претходно го следеле осомничениот и дека, според досегашните сознанија, бил познат како припадник на терористичката организација таканаречена Исламска држава.
По инцидентот, Министерството за внатрешни работи го подигна нивото на закана од тероризам на највисокиот, црвен степен, што подразбира засилено полициско присуство и контроли на клучните локации низ Србија.
Властите засега не го објавија идентитетот на напаѓачот, ниту дополнителни детали за истрагата.
Амбасадата на Израел во Белград и претходно била цел на напад. Во јуни 2024 година, напаѓач со самострел тешко ранил припадник на Жандармеријата кој ја обезбедувал амбасадата, по што бил убиен при полициска интервенција.
