По наредба на јавниот обвинител на Вишото јавно обвинителство во Ниш, припадници на Министерството за внатрешни работи (МВР), од Секторот за внатрешна контрола, уапсиле осум полициски службеници на Министерството за внатрешни работи, од Управата на криминалистичката полиција, поради сомнение дека во службените простории на Полициската управа во Бор го тепале, малтретирале и мачеле Д. Д., брат на еден од двајцата осомничени во случајот со исчезнувањето на Данка Илиќ од Бор. Тој, како последица на здобиените повреди, починал на 7 април 2024 година.
Од слобода се лишени полициските службеници на Министерството за внатрешни работи, од Управата на криминалистичката полиција, Н. П., М. Љ., Б. М., И. Т., М. С., М. Б. и З. Ѓ., сите од Белград, како и Ј. К. од Нова Пазова, поради постоење основи на сомнение дека сториле кривично дело тешка телесна повреда со смртни последици, во стек со кривичното дело малтретирање и мачење, извршени во соизвршителство, на штета на Д. Д., чија смрт била констатирана на 7 април 2024 година во службените простории на Полициската управа во Бор.
Полицијата го привела во рамки на истрагата за исчезнувањето на двегодишната Данка Илиќ.
На осомничените им е одредено задржување до 48 часа, по што, заедно со кривична пријава, ќе бидат спроведени во Вишото јавно обвинителство во Ниш на сослушување.
„Ја известуваме јавноста дека јавниот обвинител на Вишото јавно обвинителство во Ниш во изминатиот период издавал наредби за лишување од слобода на сите осомничени за наведените кривични дела, но припадниците на Министерството за внатрешни работи, од Секторот за внатрешна контрола, не постапувале по наредбите на јавниот обвинител, за што исто така ја известувавме јавноста.
По сослушувањето на сите осомничени, јавноста ќе биде информирана за преземените дејствија преку објавување соопштение на интернет-страницата на Вишото јавно обвинителство во Ниш“, соопштија од Вишото јавно обвинителство во Ниш, објавуваат српските медиуми.
