Цените на нафтата паднаа на најниско ниво од 31 август. Американската сурова нафта WTI се спушти под 88 долари за барел, додека северноморската нафта „Брент“ се тргуваше за околу 94 долари.
Падот доаѓа во период кога финансиските пазари ги проценуваат можностите за дипломатско завршување на конфликтот на Блискиот Исток, и покрај продолжувањето на нападите во регионот, пренесува „Трејдинг економикс“.
Негативниот тренд продолжи и по минатата недела, кога цената на WTI забележа пад од 12,8 отсто, додека „Брент“ поевтини за 13,3 отсто.
Американскиот претседател Доналд Трамп изјави дека се малку веројатни обемни напади врз Иран доколку Техеран прифати цврст договор. Изјавата дојде пред неговата средба со премиерот на Катар.
Сепак, изгледите за дипломатски напредок остануваат неизвесни. Американскиот државен секретар Марко Рубио ги намали очекувањата за значителен напредок во преговорите.
Според извештаите, американските сили во текот на ноќта извршиле напади врз иранскиот остров Кешм, додека тензиите продолжиле и во областа на Ормускиот Теснец, каде што наводно бил погоден танкер со проектил од непознато потекло.
Во меѓувреме, јеменските бунтовници Хути, кои имаат поддршка од Иран, ги оштетиле канцелариите на саудиската нафтена компанија „Сауди Арамко“ во Ријад. По нападот, саудиските сили уништиле два ракетни лансери.
И покрај безбедносните ризици и повторените напади врз поморскиот сообраќај, извозот на сурова нафта од Персискиот Залив почнал да закрепнува. Овој развој би можел да ги намали стравувањата на пазарите од нарушувања во снабдувањето со нафта.
