Британската шаховска сензација Бодана Сиванандан, на само 11 години, стана најмладата шахистка во историјата што ја освоила титулата женски велемајстор (WGM).
Сиванандан го обезбеди третиот и последен потребен норматив настапувајќи за Англија на 46. Шаховска олимпијада во Самарканд, Узбекистан.
Играјќи на првата табла за англиската репрезентација, таа се соочи со некои од најдобрите шахистки во светот и освои осум поени во 11 партии. Нејзиниот резултат и перформанс-рејтинг беа доволни за исполнување на условите за титулата женски велемајстор.
Со тоа 11-годишната Британка го собори рекордот на Катерина Лагно, која титулата WGM ја освои во 2002 година на 12-годишна возраст. Кинеската шахистка Хоу Јифан исто така стана женски велемајстор на 12 години во 2007 година, а една година подоцна, на 14 години, ја освои и највисоката, полово неограничена титула велемајстор (GM).
Приказната на Сиванандан е уште понеобична поради начинот на кој влегла во светот на шахот. За време на пандемијата на коронавирусот во семејниот дом во Хароу, северозападен Лондон, пронашла стара шаховска табла.
Најпрво ја привлекол изгледот на фигурите, особено коњот и кралицата. Правилата на играта почнала да ги учи сама, гледајќи шаховски туторијали на YouTube. Набргу веќе го победувала својот татко Сиванандан Велајутам, кој работи во ИТ-индустријата.
Првиот турнир го одиграла во јули 2021 година во шаховскиот клуб Хароу. Само една година подоцна, на Европското училишно првенство, како седумгодишна девојка победила во сите 24 партии.
Нејзиниот подем продолжил со неверојатно темпо. Во 2023 година стана најмладата шахистка што успеала да избегне пораз против велемајстор во натпреварувачка партија, на Европското првенство во забрзан и брз шах во Хрватска. Во 2024 година беше избрана да ја претставува Англија на Шаховската олимпијада.
Годинава Сиванандан стана и најмладата победничка на Британското женско првенство.
„Среќна сум поради титулата, но сакам да продолжам да освојувам уште повеќе во иднина. Сакам што е можно побрзо да станам велемајстор“, изјави таа по тој успех.
Покрај шахот, 11-годишната Бодана ги усогласува тренинзите и турнирите со училиштето, а свири и виолина и пијано.
Од Самарканд заминува и со втор норматив за титулата интернационален мајстор (IM), со што направи уште еден чекор кон повисокото шаховско звање.
Нејзината крајна амбиција е уште поголема – да ја освои титулата велемајстор (GM), највисоката титула во шахот, за која жените и мажите ги исполнуваат истите критериуми.
