Секојдневното консумирање боровинки би можело да помогне во ублажувањето на симптомите на депресија кај повозрасните лица, особено кај оние кои водат седентарен начин на живот. Ова го покажува пилот-истражување предводено од научници од Медицинскиот факултет на Харвард во САД.
Познато е дека повозрасните лица кои поминуваат многу време во седење имаат зголемен ризик од депресија, а физичката активност и престојот на отворено не им се секогаш лесно достапни. Поради тоа, истражувачите испитувале дали боровинките би можеле да претставуваат едноставен начин за поддршка на менталното здравје.
Истражувањето, чии резултати се објавени во научното списание „The Journal of Nutrition, Health and Aging“, траело три месеци и опфатило 18 лица на возраст од 65 години и повеќе.
Учесниците секојдневно добивале по 48 грама лиофилизиран прав од боровинки, што одговара на приближно две шолји свежи боровинки, или иста количина плацебо-прав.
По завршувањето на истражувањето, симптомите на депресија биле ублажени во двете групи. Сепак, кај лицата кои консумирале боровинки биле забележани поголеми и порамномерни подобрувања, иако разликата меѓу групите не достигнала статистичка значајност.
„Нашата цел беше прелиминарно да го утврдиме влијанието на консумирањето боровинки врз цревниот микробиом, метаболитите и симптомите на депресија“, изјавила Кортни Милер, експертка за молекуларна нутриционистика од Медицинскиот факултет на Харвард.
Промени во цревните бактерии
Покрај промените во расположението, истражувачите забележале и одредени промени во цревниот микробиом кај учесниците кои консумирале боровинки.
Била забележана промена во застапеноста на шест видови бактериски гени поврзани со ензими, од кои кај пет било утврдено зголемување. Меѓу нив бил и ген вклучен во производството на гама-аминобутерна киселина (ГАБА) – невротрансмитер кој претходно бил поврзуван со депресијата.
Научниците посочуваат дека влакната и антоцијанините, природните сини пигменти присутни во боровинките, можат да влијаат врз цревниот микробиом. Сепак, потребни се дополнителни анализи за подобро да се разберат овие процеси.
Потребни се поголеми истражувања
Истражувачите предупредуваат дека резултатите треба да се толкуваат внимателно, бидејќи студијата опфатила мал број учесници. Поголемиот дел биле жени со благи симптоми на депресија, а не лица со клинички дијагностицирана депресија.
Поради тоа, научниците сметаат дека идните истражувања треба да вклучат поголема и поразновидна група испитаници за да се утврди дали боровинките навистина имаат значајно влијание врз менталното здравје.
Иако резултатите сè уште не се доволни за да се заклучи дека боровинките можат да ја спречат или лекуваат депресијата, тие отвораат можност за понатамошно проучување на поврзаноста меѓу исхраната, цревниот микробиом и мозокот.
Научниците потсетуваат дека комуникацијата меѓу цревата и мозокот е сложен процес, а исхраната може да има важна улога во менталното здравје. Боровинките се едно од овошјата чии потенцијални придобивки сè уште се истражуваат.
