Светската метеоролошка организација (СМО), денеска предупреди дека феноменот Ел Нињо ќе стане уште посилен во текот на 2027 година, зголемувајќи ги ризиците од екстремни временски неприлики.
Ел Нињо веројатно ќе биде најголем во последните најмалку 1.000 години и ќе додаде дополнителна топлина во атмосферата каде што температурите веќе брзо растат поради глобалното затоплување, а комбинацијата значи дека 2027 година ќе го „урне“ рекордот и ќе ја регистрира досега најтоплата година, пишува Гардијан.
Зголемената топлина предизвикана од Ел Нињо веќе има последици – од влошување на шумските пожари во Индонезија до слабеење на виталните монсунски дождови во Индија, а ефектите ќе се прошират глобално, од поголем ризик од пожари во Австралија до поинтензивни поплави во Јужна Америка.
Климатската криза, предизвикана од загадувањето со фосилни горива, веќе ги влошува екстремните временски услови и убива луѓе, а најекстремниот топлотен бран што некогаш ја погоди Европа ова лето уби најмалку 35.000 лица.
Податоците од анализите на коралите, прстените на дрвјата и историските документи сугерираат дека ниту еден Ел Нињо не го достигнал ова ниво во последниот милениум, а дополнително загрижува тоа што неодамнешните истражувања покажуваат дека глобалното затоплување сега ги интензивира циклусите на Ел Нињо, кои пак ги интензивираат влијанијата на климатската криза.
Генералниот секретар на СМО, Селест Сауло, рече дека Ел Нињо има потенцијал да нанесе огромен удар на заедниците и економиите низ целиот свет.
„Веќе сме сведоци на нарушувањата и уништувањата предизвикани од сушите и поплавите и очекуваме овие влијанија да се зголемат како што се зајакнува Ел Нињо. Никогаш порано во 50-годишната историја на СМО не сме започнале толку голема мобилизација со националните метеоролошки и хидролошки служби на првите линии на прогнозирање и услуги за спасување животи и егзистенција. Немаме време за губење“, рече таа.
Ел Нињо е периодично затоплување на температурите на површината на морето во источниот Пацифик што се случува на секои две до седум години.
Обично трае до 12 месеци, предизвикувајќи обилни дождови и суши низ Латинска Америка.
Феноменот од оваа година влијаеше на приносите во тропските области и предизвика криза со храна низ цела Централна Америка.
