Рускиот претседател Владимир Путин телефонски разговараше со лидерите на Финска и Норвешка, Александар Стаб и Јонас Гар Сторе. Целта на разговорот била војната на Русија против Украина, дипломатските напори за прекин на конфликтот и можностите за промовирање на мирот и стабилноста во Европа
Од Кремљ велат дека разговорот на претседателот Владимир Путин со финскиот претседател Александар Стаб и норвешкиот премиер Јонас Гар Сторе бил „конструктивен и суштински“.
Во исто време Шведска и Данска упатија критики. Данската премиерка Мете Фредериксен рече дека ескалацијата на Русија во Украина докажува дека Москва не е сериозна во врска со дипломатијата.
Шведскиот премиер Улф Кристерсон изрази сомнежи, велејќи дека сите сакаат мир освен Путин. Според него, ваквите директни разговори ризикуваат да го поделат европскиот глас.
„Изненадувачки е што овој разговор предизвика критичка реакција во голем број европски земји. Според мене, ова е доста индикативно“, рече Јуриј Ушаков, советникот за надворешни работи на рускиот претседател.
На прашањето дали разговорот на Путин со лидерите на Финска и Норвешка би можел да влијае на процесот на преговори, портпаролот на Кремљ, Дмитриј Песков, рече дека можеби, во зависност од тоа како ќе се развиваат работите и како ќе се одвиваат околностите.
Претходно, рускиот претседател Владимир
Путин на самитот на земјите извознички на гас во Москва изјави дека обидите за исфрлање на Русија од светскиот пазар на гас ги зголемуваат трошоците за потрошувачите и дека Европската Унија и штети на сопствената индустрија и општествен систем со откажување од руските извори на енергија.
