Претставниците на Студентската листа во Србија одржаа прес-конференција во Пионирскиот парк, на која ги претставија клучните цели и следните чекори по изборниот успех. Тие порачаа дека спроведувањето на владеењето на правото, еднаквоста и ослободувањето на институциите треба да започне веднаш, без да се чека формалното формирање на новата влада.
Студентот Филип Убовиќ ги повика граѓаните и вработените во државниот сектор да пријавуваат евентуални злоупотреби во преодниот период. За таа цел, листата отвори електронска адреса uzbunjivaci@studenti.org.rs, наменета за пријавување неправилности.
„Бараме транзиција без одложување. Не дојдовме да се одмаздуваме, туку да им ги вратиме институциите на граѓаните“, изјави Убовиќ, посочувајќи дека Законот за заштита на укажувачите ги штити оние што го штитат јавниот интерес.
Во областа на медиумите, Мирјана Николиќ побара оставки во раководството на јавниот сервис РТС, вклучително и од заменикот на генералниот директор Дејан Јовановиќ, како и формирање привремено раководство. Од „Телеком Србија“ се бара оставка од генералниот директор Владимир Лучиќ и прекин на неоправданото трошење јавни средства.
Во секторот за безбедност, Светлана Станаревиќ побара оставки од директорот на БИА, Владимир Орлиќ, директорот на ВБА, Ѓуро Јованиќ, и директорот на полицијата, Драган Васиљевиќ. Побарани се и смени на раководителите на специјалните единици, како и итен прекин на надзорот врз новинарите и активистите.
Во правосудството, Јован Вујичиќ повика на непристрасно и навремено постапување на обвинителството во случаите од јавен интерес. Студентската листа побара оставки од обвинителите Ненад Стефановиќ и Миодраг Марковиќ, како и од претседателот на Уставниот суд, Владан Петров.
На крајот, претставниците ја повикаа Републичката изборна комисија во законскиот рок да ги прогласи конечните изборни резултати и да овозможи брзо конституирање на новиот состав на Народното собрание.
