Вискито можеби најчесто го поврзуваме со чаша, неколку коцки мраз и ништо повеќе, но овој пијалак е основа и за некои од најпознатите коктели во светот. Вермут, лимон, ѓумбир, праска, портокал, мед, па дури и чај и џем од малини можат да му дадат сосема поинаков карактер.
Пред коктелите, вреди да се знае и дека додавањето само неколку капки вода во чисто виски може да помогне подобро да се почувствуваат неговите ароми. Водата малку ја намалува доминацијата на алкохолот и им дозволува на посуптилните ноти полесно да дојдат до израз.
А ако сте расположени за нешто посложено, ова се девет коктели што можете да ги подготвите и дома.
Manhattan
Еден од апсолутните класици. Точното потекло на Manhattan е обвиено со неколку легенди, но најчесто се поврзува со Њујорк од втората половина на 19 век. Без разлика кој прв го подготвил, комбинацијата од виски, црвен вермут и bitters преживеала повеќе од еден век со добра причина.
Потребно е: 50 мл виски, 20 мл црвен италијански вермут и неколку капки Angostura bitters.
Наполнете чаша за мешање со мраз, додајте ги состојките и добро промешајте. Процедете во коктел-чаша и завршете со коктел-цреша.
Irish Gold
Овошен, лесен и освежителен коктел кој особено се поврзува со Ирска и Денот на Свети Патрик, но нема причина да се чека март за да се подготви.
Комбинацијата на ирско виски, праска, портокал и ginger beer создава многу попристапен пијалак за оние на кои чистото виски им е премногу интензивно.
Потребно е: 60 мл ирско виски, 15 мл ликер од праска, малку сок од портокал и 15 мл ginger beer.
Во чаша со мраз додајте ги вискито, ликерот од праска и сокот од портокал. Дополнете со ginger beer и украсете со парче лимета.
Penicillin
За разлика од повеќето класици на листава, Penicillin е релативно млад коктел. Австралискиот бармен Сем Рос го создал во 2005 година во њујоршкиот Milk & Honey, инспириран од коктелот Gold Rush.
Мед, свеж ѓумбир и лимон се спојуваат со blended Scotch, а на крајот се додава чаден Islay single malt. Резултатот е истовремено свеж, сладок, лут и чаден коктел кој за кратко време стана современ класик.
Потребно е: 60 мл blended Scotch whisky, околу 7 мл чаден single malt, 25 мл свеж сок од лимон, 22 мл сируп од мед и свеж ѓумбир.
Изгмечете го ѓумбирот во шејкер, додајте ги вискито, лимонот и медот, потоа мраз и силно протресете околу десет секунди. Процедете во чаша со мраз и на крај внимателно додајте го чадениот single malt.
Whisky Ginger Ale
Едноставен коктел што тешко може да се погреши. Особено е популарен во ирските пабови, а потребни се само виски, ginger ale и малку лимон.
Потребно е: 45 мл ирско виски, 200 мл ginger ale и 15 мл сок од лимон.
Ставете ги состојките во висока чаша со мраз, нежно промешајте и додајте неколку парчиња лимон.
The Dubliner
Името сугерира Даблин, но коктелот всушност е создаден во Њујорк. Рецептот го осмислил експертот за коктели Гери Реган во 1999 година по повод Денот на Свети Патрик.
Во него ирското виски се среќава со Grand Marnier, црвен вермут и bitters, па резултатот е значително посилен и поароматичен коктел.
Потребно е: 60 мл ирско виски, 15 мл Grand Marnier, 15 мл црвен вермут и две капки orange bitters или Angostura.
Сите состојки промешајте ги со мраз, процедете во коктел-чаша и по желба украсете со цреша. Grand Marnier може да се замени и со друг ликер од портокал.
Elevenses
Веројатно најнеобичниот коктел на листата. Elevenses комбинира виски со чај и џем од малини.
Името се однесува на традиционалната доцна утринска пауза околу 11 часот, а рецептот на Џејн Махер изгледа речиси како британски појадок претворен во коктел.
Потребно е: 60 мл ирско виски, две лажички џем од малини, 20 мл сок од лимон и 50 мл Irish Breakfast чај.
Ставете ги сите состојки во шејкер со мраз и силно протресете. Послужете во висока Collins чаша и украсете со тркалце лимон.
Rob Roy
Ако Manhattan има шкотски братучед, тоа е Rob Roy. Коктелот се појавил во Њујорк во 1894 година и името го добил по тогаш популарната оперета „Rob Roy“, инспирирана од шкотскиот народен херој Роб Рој Мекгрегор.
Главната разлика во однос на Manhattan е вискито – тука задолжително се користи Scotch.
Потребно е: 50 мл Scotch whisky, 15 мл вермут и четири капки Angostura bitters.
Состојките промешајте ги во чаша со мраз, процедете ги во Martini чаша и додајте коктел-цреша.
Sazerac
Еден од најстарите американски коктели, тесно поврзан со Њу Орлеанс. Неговите корени се бараат уште во 1830-тите години и во аптекарот Антоан Амеде Пејшо, човекот зад познатите Peychaud’s bitters.
Во раните верзии се користел француски бренди, но подоцна главната улога ја презел американскиот rye whiskey.
Потребно е: 50 мл rye whiskey, 15 мл апсинт, 10 мл шеќерен сируп, две капки Peychaud’s bitters и кора од лимон.
Со апсинтот исплакнете ја внатрешноста на ладна чаша. Одделно промешајте ги вискито, сирупот и bitters со мраз околу 20 секунди, процедете во подготвената чаша и завршете со кора од лимон.
Whisky Sour
Класика која во различни форми постои уште од 19 век. Комбинацијата е едноставна – виски, цитрус и шеќер – а современата верзија често содржи и белка од јајце, која ја создава препознатливата кремаста пена.
Потребно е: 60 мл bourbon, 30 мл свеж сок од лимон или лимета, 15 мл шеќерен сируп, 15 мл белка од јајце и две капки Angostura bitters.
Најпрво ставете ги состојките во шејкер без мраз и силно протресете за да се создаде пена. Потоа додајте мраз, повторно протресете и процедете во чаша. Завршете со кора од портокал или коктел-цреша.
Од комплексниот Sazerac до едноставниот Whisky Ginger Ale, заедничкото за сите овие рецепти е што покажуваат колку различен карактер може да добие вискито во зависност од состојките со кои ќе се спои. А кој и да го изберете, останува најважното правило – уживајте умерено.
