Младите во Германија утре излегуваат на улиците во 23 градови барајќи подобри услови за образование, прифатливи трошоци за живот и укинување на задолжителната воена служба.
Германските власти најавуваат засилено полициско присуство поради стравувањата од можни инциденти и сценарио слично на неодамнешните немири во Франција.
Протестите се организирани од иницијативата „Gen Z regelt“, позната и под името „Gen Z steht auf“, а меѓу главните барања се подобрување на образованието и здравствената заштита, заштита на климата и спротивставување на кратењата наменети за младите.
Најголемиот протест е најавен во Берлин, кај Бранденбуршката порта, каде што досега се регистрирани околу 10.000 учесници. За обезбедување на собирот ќе бидат ангажирани околу 1.500 полицајци.
Берлинската полиција најави дека ќе реагира доколку некој се обиде да ги преземе мирните протести или да предизвика насилство. Сепак, полициските претставници посочуваат дека младите досега се однесувале мирно.
Голем интерес има и во Штутгарт, каде што и покрај официјално пријавените 500 учесници, повеќе од 9.400 луѓе преку интернет најавиле дека ќе присуствуваат. Градските власти засега не гледаат законска основа за забрана на протестот, бидејќи нема конкретни докази за планирани немири.
Собири се најавени и во Минхен, Нирнберг, Франкфурт, Мајнц, Хановер и Бремен. Во Франкфурт организаторите очекуваат околу 1.700 учесници, а властите најавуваат засилено полициско присуство.
Германските безбедносни служби внимателно ја следат мобилизацијата на социјалните мрежи, особено поради стравувањата дека екстремистички групи би можеле да се обидат да ги искористат протестите за предизвикување нереди. Сепак, дел од регионалните безбедносни служби засега не располагаат со сознанија за конкретна закана или организирано преземање на протестите од екстремистички групи.
