„Timeless“: Десет досега необјавени песни на Принс достапни денес

Десет години по смртта на една од највлијателните фигури во современата музика, архивата на Принс повторно се отвора. „Timeless“ носи десет досега необјавени песни од 80-тите и 90-тите години.

30 август 2026
21:27
3 минути читање

Додај го Репер како претпочитан извор во

Принс повторно има нов албум. „Timeless“, најновото постхумно издание од богатата архива што музичарот ја остави зад себе, носи десет песни кои досега не биле официјално објавени.

Материјалот потекнува од 80-тите и 90-тите години – период во кој Принс беше на својот креативен врв и постојано ги поместуваше границите меѓу попот, фанкот, рокот, R&B и соулот.

Албумот беше најавен во јуни со синглот „Stone“, песна за љубов што завршила. Синтисајзери, тапани и електрична гитара го враќаат препознатливиот звук на периодот од кој потекнува снимката. До објавувањето на „Timeless“, песната веќе собра повеќе од половина милион стримови.

Архива која сè уште има што да каже

Принс Роџерс Нелсон е роден во 1958 година во музичко семејство, а уште во раните години од кариерата стана јасно дека станува збор за автор кој тешко може да се смести во само еден жанр.

Со албумите „Dirty Mind“ од 1980, „Controversy“ од 1981, „1999“ од 1982 и особено „Purple Rain“ од 1984 година, Принс изгради музички идентитет кој ќе остави огромно влијание врз поп-културата.

Не беше само изведувач. Пишуваше и создаваше музика и за други артисти, меѓу кои Чака Кан, Шина Истон и Шила И., а неговата фасцинација со филмот резултираше и со музиката за „Batman“ од 1989 година.

Во текот на кариерата продаде десетици милиони албуми, освои седум Греми награди и беше примен во повеќе музички куќи на славните.

Но, бројките се само еден дел од приказната.

Принс остана запаметен како музичар кој постојано се бореше за контрола врз сопственото творештво. Неговиот конфликт со музичката индустрија кулминираше со славната одлука името Prince да го замени со необичен симбол, во обид да ја врати уметничката независност и сопственоста врз својот идентитет.

Истовремено, неговата сценска појава ги уриваше конвенционалните претстави за машкоста, сексуалноста, модата и родовите норми многу пред таквите теми да станат дел од мејнстрим поп-културата.

Од „Piano and a Microphone“ до „Timeless“

По неговата смрт во 2016 година, огромната архива на необјавени снимки стана извор на нови изданија.

Следуваа „Piano and a Microphone 1983“ во 2018 година, „Originals“ во 2019 и „Welcome 2 America“ во 2021 година.

Сега на таа листа се приклучува и „Timeless“.

Насловот тешко дека можел да биде посоодветен.

Десет години по неговото заминување, Принс и понатаму звучи како автор кој не припаѓа целосно на ниту една епоха. Неговата огромна дискографија не е само каталог на хитови, туку доказ за музичар кој можеше истовремено да биде поп-ѕвезда, инструменталист, композитор, продуцент, провокатор и автор со целосно сопствен музички јазик.

„Timeless“ отвора уште една мала врата кон тој свет.