Дури и релативно мали промени во спиењето, физичката активност и исхраната можат да влијаат врз здравјето на срцето. Неодамнешно истражување објавено во списанието „European Journal of Preventive Cardiology“ привлече внимание со тврдењето дека само 11 дополнителни минути сон би можеле да го намалат бројот на срцеви и мозочни удари за 10 проценти. Сепак, ваквото толкување е погрешно и не ја прикажува целосно пораката на истражувањето.
Истражувањето ги анализирало заедничките ефекти од подолгото спиење, поголемата физичка активност и поквалитетната исхрана, пренесува Би-Би-Си.
За намалување од 10 проценти во ризикот само преку продолжување на спиењето, резултатите укажуваат дека би биле потребни околу 30 дополнителни минути сон секоја вечер. Освен тоа, намалувањето од 10 проценти не значи дека личните шанси за срцев удар се намалуваат за толкав процент.
Во истражувањето биле следени 53.000 учесници во период од осум години. Во тој период биле регистрирани нешто повеќе од 2.000 кардиоваскуларни настани, што претставува околу 3,8 проценти од испитаниците.
Доколку сите учесници спиеле доволно долго за да се постигне намалување од 10 проценти на овие настани, уделот би се намалил од 3,8 на околу 3,4 проценти.
Зошто квалитетниот сон е важен за срцето?
И покрај тоа што насловите за 11 дополнителни минути сон можат да создадат погрешен впечаток, основната порака останува важна: доволниот ноќен сон е значаен за здравјето на срцето.
Една од причините е тоа што крвниот притисок вообичаено се намалува за време на спиењето, меѓу другото поради промените во хормоналната активност. Кога не спиеме доволно, ова природно намалување може да биде помало, со што крвните садови остануваат под поголемо оптоварување.
Со текот на времето, покачениот крвен притисок може да придонесе за оштетување на крвните садови и развој на атеросклероза, состојба при која во артериите се наталожуваат масни наслаги.
Прераното будење, пред телото да биде подготвено, може да биде проследено и со зголемување на хормоните на стрес, кои влијаат врз нервниот систем и работата на организмот.
Истражување спроведено во САД во 2014 година покажало дека бројот на срцеви удари се зголемил за 25 проценти во понеделникот наутро по преминот кон летно сметање на времето, кога луѓето губат еден час сон, пренесува Би-Би-Си.
Сепак, ваквите наоди не значат дека губењето еден час сон автоматски ќе предизвика срцев удар, туку укажуваат на можна поврзаност меѓу нарушувањето на спиењето и кардиоваскуларните настани.
Колку сон е доволно?
За повеќето возрасни лица се препорачуваат најмалку седум часа сон во текот на ноќта, а на многумина им се потребни од седум до девет часа за оптимално функционирање.
Доколку редовно спиете помалку од потребното, постепеното продолжување на времето за спиење може да биде корисен чекор. Редовниот распоред за легнување и будење, ограничувањето на кофеинoт во доцните часови и создавањето мирна средина за спиење исто така можат да помогнат.
Дополнителните минути сон сами по себе не се гаранција за заштита од срцев или мозочен удар. За здравјето на срцето се важни и редовната физичка активност, урамнотежената исхрана, контролата на крвниот притисок и избегнувањето пушење.
Иако одложувањето на алармот нема магично да го спаси животот, квалитетниот сон, како дел од здравите секојдневни навики, може да придонесе за подобро здравје на долг рок.
