Саудиските власти погубија маж и жена од Бангладеш осудени за „непристоен чин“ во џамија во светиот град Мека, соопшти саудиското Министерство за внатрешни работи без да прецизира за какви точно дејствија станува збор, иако во објавите на социјалните мрежи се тврди дека наводниот инцидент вклучувал бакнеж во челото.
Според извештаите на локалните медиуми, властите во Бангладеш дознале за погубувањето на нивните двајца државјани дури откако егзекуциите биле извршени минатата среда.
Бангладеш побара од саудиската влада дополнителни информации за случајот и за судењето. Веста за егзекуциите предизвика загриженост во Бангладеш, со оглед на тоа што повеќе од три милиони нејзини државјани живеат и работат во Саудиска Арабија, претежно на нископлатени работни места.
Инаку, двете земји негуваат блиски односи засновани врз верски врски и силна економска соработка.
