Актерката Кристина Еплгејт откри дека пред пет години погрешно ѝ била дијагностицирана мултиплекс склероза, но и покрај новите сознанија, нејзините здравствени проблеми продолжуваат, а состојбата ѝ се влошила.
„Мојот лекар влезе во собата и ми рече: ‘Честитки, немате мултиплекс склероза’“, раскажа 54-годишната актерка низ солзи во подкастот „MeSsy“, во вторникот. Таа објасни дека не била среќна поради веста, иако сите околу неа биле пресреќни.
Ѕвездата на серијата „Married… with Children“ нагласи дека погрешната дијагноза не значи дека нејзините симптоми исчезнале.
„Не ми е подобро. Напротив, состојбата ми се влоши“, изјави таа, додавајќи дека сега лекарите ќе спроведат детални испитувања за да утврдат што навистина се случувало со нејзиното здравје од 2021 година.
Еплгејт откри дека дијагнозата целосно ѝ го променила животот во изминатите пет години. Таа поминала низ тешка депресија, ја изгубила работата и сè уште има сериозни ограничувања во секојдневието. Како што објасни, и понатаму мора да користи инвалидска количка кога оди на лекар, бидејќи не може да го помине ниту растојанието од автомобилот до ординацијата.
Актерката призна дека е збунета и потресена бидејќи со години верувала дека ја знае причината за своите здравствени проблеми.
„Имав причина. Имав, по ѓаволите, причина зошто секој ден ми беше ужасен. А сега немам причина, што многу ме вознемирува и ме збунува“, изјави таа.
Таа додаде дека сè уште е во состојба на шок и дека новото сознание целосно ѝ го нарушило чувството за сопственото здравје.
Еплгејт, која заедно со актерката Џејми-Лин Сиглер го води подкастот „MeSsy“, претходно се повлече од снимањето за да го обработи сознанието за погрешната дијагноза и да се справи со други здравствени проблеми.
Во специјалното издание на подкастот, во кое гостувала и д-р Марва Кајси, вонредна професорка на одделот за неврологија во медицинскиот центар „Седарс-Синај“, било објаснето дека дијагностицирањето на мултиплекс склерозата може да биде сложено.
Според специјалистката, не постои еден единствен тест со кој со сигурност се потврдува или исклучува болеста. Дијагнозата се поставува врз основа на повеќе критериуми, што може да го отежне процесот и да доведе до погрешни процени.
Еплгејт претходно отворено зборуваше за животот со дијагнозата и стана препознатливо лице во заедницата на луѓе со мултиплекс склероза. Сега признава дека чувствува чудна празнина и вина, бидејќи повеќе не знае како да го објасни сопственото искуство.
И покрај новите сознанија, актерката сè уште се соочува со сериозни здравствени тешкотии, а лекарите допрва треба да утврдат што ги предизвикува нејзините симптоми.
