Адријан Манарино не успеа долго да остане на годинашниот УС Опен, но од Њујорк заминува со изјава која привлече големо внимание.
Французинот во првото коло го совлада Аргентинецот Тијаго Тиранте во пет сета, но во второто беше убедливо поразен од Казахстанецот Александар Бублик со 6:3, 6:1, 6:1.
По мечот, 38-годишниот Манарино пред камерите на Eurosport призна дека против Бублик бил „катастрофа од почеток до крај“ и не се обиде поразот да го оправда со условите. Сепак, имаше многу што да каже за атмосферата на Флашинг Медоус.
„Имав многу проблеми со условите за игра. Не е лесно да се игра навечер, со бучавата, вештачкото осветлување и сето тоа. Работите се менуваат“, рече Манарино.
Според него, промените не одат во добра насока.
„Сега луѓето можат слободно да се движат по трибините додека се играат поените“, забележа Французинот.
УС Опен уште од изданието во 2024 година ги либерализираше правилата за движење на гледачите. Во одредени делови од трибините пристапот е контролиран, додека во други зони на навивачите им е овозможено поголемо движење. Тоа дополнително ја менува атмосферата на турнирот кој и претходно важеше за најбучниот меѓу четирите гренслем турнири.
Но Манарино не застана само на бучавата.
„Има врева насекаде. На теренот мириса на марихуана, се претвора во зоолошка градина. Ова се навистина необични услови. Луѓето влегуваат како што сакаат, се движат, разговараат… Турнирот го толерира тоа, а не знам дали е најдобро за играчите и за спортот воопшто“, изјави тој.
Французинот смета дека во тенисот навистина постојат правила што треба да се модернизираат, но ова не е едно од нив.
„Мислам дека има многу правила што би можеле да се променат во тенисот, но ова сигурно не е она што требаше да се менува во моментов“, додаде Манарино.
Мирисот на марихуана не е нов проблем во Њујорк
Манарино не е првиот тенисер кој се пожалил дека за време на мечевите на УС Опен чувствува мирис на марихуана.
Ова прашање привлече големо внимание уште на турнирот во 2022 година, а слични поплаки имаше и следната сезона. Рекреативната употреба на канабис за полнолетни лица е легална во државата Њујорк од 2021 година, а веднаш до тенискиот комплекс се наоѓа големиот парк Flushing Meadows–Corona Park.
Maria Sakkari smells weed during tennis match. pic.twitter.com/JDRvAV8NXc
— MMA Cardinal🥇🥊 (@MmaCardinal) August 28, 2023
Во 2023 година, Марија Сакари за време на меч му се пожали на судијата поради мирисот.
„Мирисот, о Боже… Мислам дека беше марихуана и дека доаѓаше од паркот“, рече тогаш грчката тенисерка. Подоцна објасни дека организаторите тешко можат да влијаат врз она што го прават луѓето во соседниот парк.
На сличен проблем претходно укажуваше и Ник Кирјос. Австралиецот, кој има астма, тврдеше дека чадот дополнително му го отежнува дишењето додека трча по теренот.
И инфлуенсерите предизвикаа проблем
Бучната атмосфера на годинашниот УС Опен веќе предизвика уште една контроверзија.
За време на мечот меѓу Наоми Осака и Анастасија Захарова во првото коло, судијата мораше да ја прекине играта и да предупреди група инфлуенсери во ложите кои правеле врева и создавале содржини додека траеле поените.
„Ве молам, ложата зад мене, седнете“, интервенирал судијата.
This was one of the cringiest things I’ve ever seen live. The US Open used to be an actual tennis tournament https://t.co/1kAYND6VOe pic.twitter.com/c1jbi4lUlQ
— Danny Singer (@michiganboy310) September 2, 2026
Снимката од ситуацијата се прошири на социјалните мрежи и предизвика критики, особено затоа што билетите за гледачите се распродадени, додека дел од местата во ложите ги добиваат инфлуенсери кои, според критичарите, повеќе внимание посветуваат на создавањето содржини отколку на тенисот.
УС Опен отсекогаш имал поинаков карактер од Вимблдон, Ролан Гарос и Австралија Опен – погласен, понеформален и со типична њујоршка атмосфера.
За Манарино, сепак, границата очигледно е премината.
