Извршниот одбор на Народната банка на Србија донесе одлука за одземање на дозволата за работа на Алта банка АД Белград, соопштија синоќа од Народната банка на Србија (НБС).
Како што се прецизира во соопштението, Агенцијата за осигурување на депозитите со судско решение ќе биде назначена за стечаен управник.
Како што наведуваат од Народната банка на Србија (НБС), на одлуката ѝ претходеле контролни активности насочени кон подобрување на ликвидноста на банката.
„Утврдено е дека во изминатиот период финансиската состојба на банката значително се влошила и дека постои ризик од нејзино натамошно влошување, како и од дополнително нарушување на ликвидноста, со што се загрозени интересите на депонентите“, се наведува во соопштението на НБС.
Со оглед на тоа што биле исполнети условите за одземање на дозволата за работа на банката, Народната банка на Србија (НБС) соопшти дека одлуката е донесена во согласност со Законот за банки, со цел да се заштитат интересите на депонентите и да се зачува стабилноста на финансискиот систем.
Како што се наведува во соопштението, Агенцијата за осигурување на депозитите во рок од седум работни дена ќе им овозможи на депонентите исплата на осигурените износи и располагање со средствата, во согласност со Законот за осигурување на депозитите.
