Тројца работници ангажирани преку договор загинаа во фабрика на индиската компанија „Тата Електроникс“, која произведува компоненти за мобилните телефони „Ајфон“ на „Епл“, во сојузната држава Тамил Наду, на југот на Индија.
Несреќата се случила во понеделникот вечерта, за време на работи на одржување во постројка за пречистување отпадни води во фабриката во градот Хосур, соопштија локалните власти.
Според окружниот функционер Динеш Кумар, работниците вдишале гас додека вршеле проверка на надворешен резервоар за нано-филтрација. Постројката за пречистување ја управувала компанијата „Налко Вотер“, дел од американската групација „Еколаб“.
Случајот ќе биде предмет на истрага од страна на „Епл“, „Тата“ и надлежните државни институции. Компаниите засега не одговориле на барањата на „Ројтерс“ за коментар.
Тамил Наду е еден од најважните индустриски центри во Индија, каде што работат фабрики на голем број меѓународни компании.
Индиската министерка за индустрија Вирудаи Магал Киртана изјави дека смртта на работниците ќе биде темелно истражена и дека ќе бидат преземени соодветни мерки врз основа на резултатите.
Според индустриски извори, производството во фабриката не е погодено, бидејќи објектот бил затворен поради хиндуистичкиот празник Дивали.
Фабриката на „Тата“ во Хосур и претходно се соочила со проблеми. Во 2024 година пожар го запре производството, а годинава локалните власти предупредија на можност за затворање поради сомневања за загадување на подземните води. Дополнително, хакерски напад со откупнина врз соседна фабрика во истиот комплекс доведе до протекување документи поврзани со тогаш сè уште необјавениот модел „Ајфон 18 Про“.
Според податоците наведени од „Ројтерс“, Индија денес произведува околу 25 отсто од светските модели на „Ајфон“, а „Тата“ учествува со приближно 40 отсто во склопувањето на овие уреди во земјата.
