Претседателот на Делегацијата на Европскиот парламент за односи со Албанија, Марко Тарквинио, и постојаниот известувач на Европскиот парламент за Албанија, Андреас Шидер, изразија загриженост поради ескалацијата на протестите во Тирана.
Во заедничко соопштение тие ги осудија насилството, нападите врз институциите и уништувањето имот, повикувајќи на истрага за наводите за прекумерна употреба на сила од страна на полицијата.
Европратениците нагласија дека почитувањето на владеењето на правото останува клучен критериум и задолжителен услов за напредокот на Албанија кон членство во Европската Унија.
-Во име на Делегацијата на Европскиот парламент за односи со Албанија и во својство на постојан известувач на Европскиот парламент за Албанија, ја изразуваме нашата длабока загриженост поради неодамнешните настани во земјата, особено во Тирана.
Ја осудуваме насилната ескалација на овие протести, нападите врз јавните институции и уништувањето јавен и приватен имот. Ги повикуваме демонстрантите да покажат максимална воздржаност и да се воздржат од какви било акти на насилство, бидејќи таквите постапки не придонесуваат за решение и немаат место во демократијата, стои во реакцијата.
