Обвинителството за организиран криминал на Србија денеска соопшти дека отворило предмети по две кривични пријави поднесени против српскиот амбасадор во Словачка, Александар Накиќ, и амбасадорот во САД, Драган Шутановац, поради злоупотреба на службената положба и повреда на избирачкото право.
Според обвинителството, доставени се уште 13 кривични пријави против повеќе српски амбасадори за злоупотреба на службената положба, повреда на избирачкото право и спречување одржување на гласањето. Кривични пријави биле поднесени и против министерот за надворешни работи во српската влада, Марко Ѓуриќ, началникот на Одделението за безбедност во Генералниот секретаријат на Министерството за надворешни работи, Веско Радовиќ, како и вршителот на должноста генерален секретар во Министерството, Душан Козарев.
Се наведува дека на 20 октомври обвинителството испратило барање до Министерството за надворешни работи на Србија и Републичката изборна комисија (РИК) за доставување потребни информации.
„Веднаш по приемот на наведените кривични пријави, надлежниот јавен обвинител за организиран криминал презеде итни мерки за собирање информации и побара проверки од Министерството за внатрешни работи – Службата за борба против организираниот криминал (СБПОК)“, се наведува во соопштението.
Во Србија на 25 октомври се одржаа предвремени парламентарни избори на кои победи опозициската „Студентска листа“. Лидерот на листата „Обединета Србија“, Александар Вучиќ, го призна поразот, со што заврши неговото 14-годишно владеење.
Граѓаните гласаа на 93 избирачки места во странство. Без оглед на тоа во кој дел од светот се наоѓале, морале да гласаат според времето во Србија. И покрај рекордниот број пријавени гласачи во странство, речиси трипати поголем во споредба со претходните избори, властите одбија да отворат избирачки места во десетици градови. Меѓу градовите во кои не можело да се гласа, иако тоа било можно на претходните избори, се Букурешт, Софија и Солун, Ванкувер во Канада, Грац во Австрија и Истанбул во Турција, поради што некои српски државјани патувале стотици, па дури и повеќе од илјада километри за да го остварат своето право на глас.
