Авганистанската велосипедистка Фариба Хашими освои сребрен медал во друмската трка на Азиските игри во Нагоја, откако била принудена да се преправа дека е маж за да може да тренира во својата татковина.
Хашими до медалот стигна откако патеката долга 90,4 километри ја помина за 2 часа, 50 минути и 5 секунди. Златото го освои Кинезинката Гуо Ли, додека бронзата ѝ припадна на Леунг Винг Ји од Хонг Конг.
23-годишната велосипедистка од изолираната авганистанска провинција Фарјаб, неколку години тренирала во својата татковина преправајќи се дека е маж.
Авганистан го напуштила во 2021 година, кога Талибанците повторно ја презедоа власта, по што се преселила во Италија.
„Ни ја одзедоа слободата, ни одзедоа сè. Овој медал е нешто посебно. Родена сум во земја во која жените кои сонуваат се напаѓани и среќна сум што се борев против тоа. Овој медал може да ја покаже огромната издржливост на авганистанските жени и многу сум среќна. Не сум сама.“
„Знам дека зад мене стојат милиони жени од многу земји кои го имаат истиот сон и се со мене“, изјави Хашими за порталот Олимпик.
