Премиерот Христијан Мицкоски денеска оствари работна средба со раководството на Дојче Телеком, на која се разговарало за можностите за продлабочување на соработката и нови инвестиции во дигиталната трансформација на Македонија, соопштија од Владата.
На средбата, Мицкоски ја предводел владина делегација во состав на вицепремиерот и министер за транспорт Александар Николоски, министерот за надворешни работи и надворешна трговија Тимчо Муцунски, министерот за дигитална трансформација Стефан Андоновски и директорот на ТИРЗ, Гоце Димовски.
Од страна на Дојче Телеком присуствуваа главниот извршен директор Тимотеус Хетгес и членот на Управниот одбор и главен извршен директор за Европа, Доминик Лерој.
Во фокусот на разговорите биле можностите за инвестиции во современи технологии во медицината и инженерството, унапредување на комуникациската инфраструктура, развој на вештачката интелигенција и сајбер-безбедноста.
Биле разгледани и плановите за развој на концептите за паметен и безбеден град, како и зајакнување на безбедноста на државата преку примена на современи технолошки решенија.
На средбата станало збор и за европската конкурентност, безбедноста и дигиталниот суверенитет, како стратешки приоритети за Европа, со посебен акцент на cloud технологиите, индустриската вештачка интелигенција и сајбер-безбедноста.
Како што информираат од Владата, средбата претставува можност за унапредување на соработката со една од водечките европски телекомуникациски компании и отворање нови перспективи за дигиталниот развој на земјата.
