Бројот на загинати во верижните сообраќајни несреќи на автопатот „Тракија“ се искачи на 13

  • 2 минути читање
Додај го Репер како претпочитан извор во

Бројот на жртвите во двете тешки верижни сообраќајни несреќи на автопатот „Тракија“ во Бугарија се зголеми на 13, откако во болница во Бургас починал уште еден повреден маж. Станува збор за 42-годишен жител на Елхово, кој бил хоспитализиран во болницата „Дева Марија“.

Тешките сообраќајни несреќи се случија утрото на 10 ноември, во близина на патните јазли „Зимница“ и „Кабиле“. Во двата судира, кои се случиле во спротивни насоки на движење, учествувале вкупно 86 возила – 63 во правец кон Бургас и 23 во правец кон Софија.

Првата пријава за несреќата била примена нешто по 7 часот наутро. Според првичните информации од бугарското МВР, првиот судир се случил во лентата кон Бургас, откако товарно возило му го попречило патот на автобус со патници. Потоа во автобусот удрил друг камион што превезувал жито, а следувале и судири со други автомобили.

Набргу потоа се случила и втора верижна несреќа во спротивната насока, кон Софија. Се претпоставува дека дел од возачите го пренасочиле вниманието кон тешката несреќа на спротивната страна од автопатот.

Густата магла ја намалила видливоста на само 10 метри

Како еден од главните фактори за несреќите, бугарските власти ја посочија густата магла, која нагло ја намалила видливоста. Според сведоштва на очевидци, видливоста првично изнесувала меѓу 70 и 80 метри, но во одреден момент се намалила на околу 10 метри.

Главниот секретар на бугарското МВР, Љубомир Николов, соопшти дека загинатите во првично утврдените околности биле пронајдени во коловозната лента во правец кон Бургас. Тој апелираше до возачите да ја приспособат брзината и растојанието според временските услови и видливоста.

Голема спасувачка операција и десетици повредени

По пријавата веднаш била активирана операцијата „Спаси“, во која учествувале полициски службеници од Јамбол и соседните области. На терен биле испратени 15 противпожарни возила, полициски екипи, спасувачи и амбулантни возила.

Повредените биле пренесени во болници во Јамбол, Сливен и Бургас. Според податоците на бугарското Министерство за здравство од 10 ноември, во болниците биле примени вкупно 51 лице, од кои 13 биле во тешка состојба.

Поради сериозноста на несреќите, автопатот бил затворен во двата правци, а сообраќајот се пренасочувал по алтернативни патни правци.

Истрагата ја презеде Националната истражна служба

Истрагата за двете несреќи ја презеде Националната истражна служба на Бугарија. Отворени се две преткривични постапки, со оглед на тоа што судирите се случиле во двете насоки на автопатот.

Во истрагата се вклучени 10 истражители, а извршени се и повторни увидувања на местата на несреќите, вклучително и со помош на дрон.

Во тек се вештачења со цел да се утврдат точниот механизам на судирите, редоследот на ударите и причините што довеле до една од најтешките сообраќајни несреќи во земјата. Се собираат докази и се проверуваат сите можни верзии за трагедијата.

Најнови вести