Германско семејство кампери решило многу порано од планираното да го заврши летувањето во Хрватска. Во кампот „Lavanda“ во Оребиќ поминале само пет дена, по што ги спакувале работите и заминале.
Своето искуство го споделиле во Facebook групата „Kroatien mit Camper“, а објавата набрзо привлекла големо внимание и била пренесена и од германскиот портал „Merkur.de“.
На почетокот од престојот семејството имало претежно позитивни впечатоци. Им се допаднале уреденоста на кампот и големината на дел од парцелите, а особено ги пофалиле модерните и чисти санитарни јазли.
Задоволни биле и од ресторанот во кампот. Според авторката на објавата, храната била многу добра, а цените прифатливи. Ниту на плажата немале проблем да најдат слободна лежалка и чадор за сонце.
Сепак, еден проблем на крајот го засенил сето останато – недостигот од природна сенка на нивната парцела.
За време на високите летни температури престојот станал сè понепријатен, а семејството оценило дека повеќе не може да продолжи со одморот во такви услови.
„На овие температури за нас беше речиси неиздржливо“, напишала Германката.
Таа објаснила дека биле свесни оти летуваат во период кога високите температури се очекувани, но комбинацијата од жештината и парцелата без сенка сепак се покажала како преголем проблем. Се обиделе да добијат друго место во кампот што повеќе би им одговарало, но не успеале.
Жештината не била единствената забелешка. Семејството се пожалило и на повремен непријатен мирис од канализацијата, многу слаб Wi-Fi, како и на стрмната патека до плажата.
Последното особено им пречело бидејќи патувале со дете и секојдневно морале да носат работи до морето и назад.
„Сè на сè, овој камп едноставно не беше за нас“, заклучиле тие.
Сепак, заминале и со неколку позитивни впечатоци. Посебно го пофалиле персоналот на рецепцијата, како и одлуката да не им бидат наплатени дополнителни трошоци поради предвременото заминување.
Нивната објава предизвикала дискусија меѓу другите кампери, а дел од нив споделиле сосема поинакви искуства од истото место. Неколку гости напишале дека биле исклучително задоволни од кампот, но посочиле една важна разлика – нивните парцели биле во првиот ред покрај морето.
Различните реакции покажуваат колку локацијата на самата парцела може да го промени искуството од кампувањето, особено во најтоплиот дел од летото.
