Вечерва во Македонскиот Народен Театар, скопската публика ќе има можност премиерно да го погледне остварувањето „17“, официјалниот македонски кандидат за наградата „Оскар“ во категоријата за Најдобар меѓународен игран филм.
Проекцијата е во рами на програмата на 26. Скопје Филм Фестивал.
Филмот „17“ на режисерката Косара Митиќ претставува суптилен и емотивно суров увид во созревањето, личните борби и предизвиците на новата генерација, отворајќи прашања за идентитетот и слободата.
Свечената премиерa ќе почне со дефиле на црвениот килим со почеток од 20 часот и 30 минути, по што со почеток во 21 часот, ќе следува официјалната премиерна проекција на филмот.
Основан во 1998 година, Скопје Филм Фестивал годишно привлекува меѓу 6.000 и 10.000 посетители, како и бројни домашни и странски филмски професионалци.
Од оваа година, фестивалот влегува во фаза на трансформација и осовременување на својата програмска структура и визуелен идентитет.
Со нов меѓународен фестивалски совет и тим составен од истакнати професионалци од Европа и светот, Скопје Филм Фестивал се позиционира како водечки културен двигател во регионот и еден од темелните столбови во реализацијата на проектот „Скопје Европска престолнина на културата 2028“.
