Прехранбените навики се еден од факторите што можат да влијаат врз должината и квалитетот на животот. Ден Битнер, истражувач кој со години ги проучува таканаречените „сини зони“, односно региони во светот каде што луѓето често доживуваат длабока старост, издвојува четири вида храна што препорачува да се избегнуваат или барем да се ограничат. Тој советува овие производи да не бидат постојано достапни во домот, пренесува „Индекс“.
Битнер ги истражувал животните навики на жителите на сините зони, вклучувајќи ја нивната исхрана, секојдневната физичка активност и другите фактори поврзани со долговечноста. Според него, важно е да внимаваме не само на тоа што го јадеме, туку и на храната што ни е постојано на дофат.
Во едно од неговите неодамнешни видеа, тој истакнал дека повременото уживање во омилените производи не е проблем, но дека одредени намирници не треба редовно да ги чуваме дома.
Преработено месо
На прво место се наоѓа преработеното месо, како шунка, сланина, сувомесни производи и одредени видови колбаси. Нивното консумирање е поврзано со зголемен ризик од одредени здравствени проблеми, вклучувајќи го и ракот на дебелото црево.
Според организацијата Cancer Research UK, постојат докази за поврзаност меѓу консумирањето преработено месо и зголемениот ризик од рак на дебелото црево. Ризикот е поврзан и со црвеното месо, иако зависи од количината и видот на месото.
Како алтернативни извори на протеини може да се изберат пилешко и мисиркино месо, јајца, мешунки и други растителни намирници богати со протеини.
Слатки и засладени пијалаци
Втората категорија ги опфаќа слатките и пијалаците со додаден шеќер. Газирани пијалаци, засладени сокови, бисквити, чоколади и други индустриски произведени слатки можат да придонесат за прекумерен внес на шеќер, особено ако се консумираат секојдневно.
Битнер советува овие производи да не ни бидат постојано на дофат. Наместо редовно да ги чуваме дома, можеме повремено да си дозволиме некое слатко задоволство.
Прекумерниот внес на додаден шеќер може да придонесе за зголемување на телесната тежина и да го зголеми ризикот од дијабетес тип 2, кардиоваскуларни заболувања и замастување на црниот дроб поврзано со метаболички нарушувања.
Солени грицки
Чипсот, крекерите и другите солени грицки се третата категорија на списокот. Овие производи често содржат големи количества сол, а поради нивната лесна достапност и вкусот, лесно може да се изедат во поголеми количества од планираното.
Прекумерниот внес на сол може да го зголеми крвниот притисок, еден од главните фактори на ризик за срцеви заболувања и мозочен удар. Долгорочно, прекумерната количина сол може да влијае и врз здравјето на бубрезите.
Како поздрави алтернативи може да се изберат несолени јаткасти плодови, свеж зеленчук или домашно подготвени грицки со контролирана количина сол.
Важни се секојдневните навики
Според Битнер, избегнувањето на одредени производи дома може да помогне во намалувањето на непотребното грицкање. Кога храната што ја јадеме од навика не ни е постојано достапна, полесно можеме да ги контролираме количините и да направиме подобар избор.
Сепак, тоа не значи дека една чоколада, кесичка чипс или повремено газиран пијалак сами по себе претставуваат сериозна закана за здравјето. Многу поважни се целокупниот начин на исхрана, количината и зачестеноста на консумирање, како и другите животни навики.
Урамнотежената исхрана, редовната физичка активност и ограничувањето на прекумерниот внес на сол, шеќер и преработено месо можат да придонесат за подобро здравје и поквалитетен живот.
